Retire move san

 Retire move san

 

Kisa ki pase sila ki di se yo ki ap deside pou peyi sa a? Istwa ap repete e se nan move sans lan chak jou. Stateji ap mete atè pou fini ak sa ki pi mal yo, mas pèp la. Taks sou transfè yo, moun isit pa resevwa transfè an dola nan mezon transfè yo, se an goud e ak yon to trè fèb pa rapò ak sa ki sou mache a, pil konplikasyon pou louvri yon kont dola pou ka jwen transfè w an dola, goud la kap pran kalòt san rete nan men dola, epi blip yon ogmantasyon plis pase 100% sou gaz la, san nou pa bliye gaz propàn nan san kontròl li monte lè li vle jan li vle, li 400 goud pou yon galon kèk kote. Kalòt, kout pwen, sabò, kout pye ... nan figi malere ki pa gen okenn defans, pa gen espwa menm paske menm bouch twou a li pa wè kounya. E kote ti rès ki te pou pèp la?

• Eeeey madanm, ou kwè nap chape ? Kòb meriken an te deja ap monte, gaz la te ra, pou pote yon solisyon ak gaz la, m tande se monte yo monte gaz la, ti galon gazolin lan ap 520 goud nan ponp, ou kwè se vre sa m tande a ?

• M tande yon bagay konsa kap pale wi Thalie. Nou mele. Ou imajine kous machin nou pral pran pou n al nan aktivite n? 

• Bon kounya bagay la pral pi mal pase dechennen. Ou imajine bagay kap vann nan mache ? Ou tap plenyen lòt jou 3 ze pou 100 goud, se kounya ou pral wè koze, Yon ze pral 100 goud, gad pou wè sa m Di w lan.

• Kounya, kisa yo lage ti jèn yo fè? Ou te gen metye se anba goumen ou jwen yon degaje. Se debat ou tap debat pou siviv. Kounya, ti biznis ki te konn pran 3, 4, 5,10 moun pou travay, yap ka kenbe? Otomatikman pwodwi oubyen sèvis yo ap ogmante men yap jwen menm kliyantèl la? Yap gen menm rantre a pou kenbe tout moun yo nan travay la ? 

• Konpresyon ki pral fèt pitit

• Se sa ki lojik la, moun nan pap kite biznis li kraze, lap voye kèk ale pou l ka gen ren.

• Chomaj pral ogmante, gang pral ranfòse, pral gen plis vòlè paske bouch lan fann fòk li manje. 

• Sak nèvan se paske peyi sa toujou gen devèn, se sa k pi mal yo ki ap dirije, yo lage yon vye pichon sou peyi sa wi. Pou leta bay franchiz, li pa kontrole dwán, pò, frontyè lib, gen DGI, yo fenk chanje plak epi leta pa gen kòb? Sa yo se pa lajan leta ?

• Wap di sa, si leta diminye privilèj gro tèt isit, ranfòse dwán yo, mete plis kontròl nan DGI ak lòt kote yap kolekte taks elatriye yo pap jwen kòb pou yo ka fè restoran kominotè, bay ti peyizan bon angrè pou plante, ranfòse lagrikilti pou yon fwa, fè plizyè bon program sosyal ? Se swadizan sibvansyon gaz la menm kap bay lajan pou fè sa? 

• Gen bagay ki pral fèt vre pitit? Ou bliye kòb palman te gen promès pou fè dis, pou fè dat?

• Eeeeeey nou pran nan machoukèt, vye pichon wi madanm.

Eske leta pa gen kòb pou li sibvansyone gaz la? Ki bidjè leta genyen? Nan bidjè l, si l genyen, konbyen pousantay ladan ki destine pou envestisman, bon jan envestisman ? Se sèl kòb sibvansyon an ki ka fè yon bagay? DGI, ladwán, plak ki fenk chanje, redwi avantaj minis, direktè, moun ki nan leta, sispann franchiz degrenn gòch pasi pala … pap ogmante resèt leta? Li lè, li tan pou n retire move san ki nan tèt nou nan.

Ti Kozri

Rezo Kretyen Beni || RKB