Nou gaspiye

Pandan tout ayisyen kontan Joe Biden prezidan peyi meriken kòmsi Lèzetazini se Ayiti, kòmsi yo bliye si pouvwa tèt kale wòz la se sou dènye prezidan demokrat la li te koumanse, fòk nou fon voye je nou isit nan peyi nou pou nou gade nan ki kalte kras nap viv. Pase Yon ti dlo nan je nou pou nou reveye e wè klè paske eleksyon sa yo sanble fè nou dòmi e menm reve, chanjman petèt ? Nou pa konnen, chanjman se nou menm ki sou zile a ki pou fèl ? Oubyen nou bliye ? Pandan plizyè ane ki pase, depi menm anvan pouvwa wòz la, ayisyen ap gaspiye, blan meriken te voye je gade nou pou ede n ? Li vin plis aksantye kounya, men depi lontan, nou ap gaspiye. Nou sonje, Jacques Roche, Jean Dominique, Brignol Lindor … ? Inivèsitè kal lave veso kay blan, al benyen ti granmoun, leve bwat pou ti kòb la tonbe, yo tout gaspiye. Mete sou li, tijèn tankou Évelyne Sincère, Grégory Saint Hilaire, Samul Mical, espwa peyi a, ak nèg save tankou Mèt Monferrier Dorval, jounalis, polisye, elatriye ki gaspiye. Kilè nap louvri je nou ? Nan kras nou ye la, nou alèz ? Nou pa wè nap gaspiye ?

Madanm, hmmm.
Sa w genyen ou pentad pentad konsa ?
Pitit se a sa ki rive ti pitit filo a map reflechi wi. Men, nou pa serye isit la non.
Bagay sa revòltan vre wi.
Sak dròl la, ou pa wè se yon chèf gang ki mennen asasen an bay lapolis ? Kòmsi, chèf sa se anketè lapolis li ye. Men, otorite isit pa serye menm. Kòb leta ki la pou finanse sèvis entelijans peyi an, kote li pase ?
Nan fanm sou kote, nan plezi, nan bandi tou. E pa peyi yap fè.
Epi, dirijan isit pa sanble pa wè nan je yo, yap mande dyaspora rantre nan peyi a pou fèt fen dane yo, e pa mechan yo mechan ?
Peyi an gen dirijan Nephtalie ?
Ou pa ta lage l konsa Thalie, san filtè wi makomè. Ou ta brose l.
Epi, Ann serye pat gen avi rechèch kont bandi ki mennen asasen an bay lapolis la ?
Wap rantre nan senmèt senkant moun yo wi pitit, m pale w.
Kilè nap deside fè peyi menm ? Paske lè nou deside map kanpe rantre byen fon nan senmèt senkant yo.
Sam konnen !!!
Bon, banm touyew nèt, ou pa tande asasen yo mennen bay lapolis la se mennaj ti dam nan ?
Sal ye ?
Yo ba l bwè yon bagay epi yo toufe l ak oreye. Ou konn pouki yo touye l ?
Oo
Yo touye l paske li renmen ak yon nèg nan baz Bèlè a, baz menm nèg sa yo tap goumen dènyeman pou kraze a.
Men li fout.
Mennaj ti dam lan, sa yo arete a, se nan menm baz ak chèf ki mennen l lan li ye.
Bon, ki jan ou fè konn tout bagay sa yo pitit ? Anketè ou ye ?
Ou pap fè nouvèl ou menm ?
Bon m genyen w kòm jounalis, m pa bezwen.
Bon, wap pale a, se manti m fè ?
M pa di sa non kòmè.
Bon banm ba w yon lòt zen, ou pat tande prezidan te di se a 10 zè 12 ou 13 yo konsa mèt la mouri e se 2 a 3 minit aprè, blòk 10 zè 15 madanm li ap montre l videyo asasina.
Ou serye ? Epi, yo pa al reponn kesyon lajistis ? Yo nan figi moun la toujou ?
A, isit la nou pap fè peyi, nap kole krache pou nou konstwi gro kay.
Men li wi, entelektyèl ap gaspiye.
E sila ki fè fakilte, gwo entèlektyèl nan peyi l, li nan yon dyòb degouden, menm yon vye bogi, yon vye machin senkyèm men li pa ka achte pou yo woule. Paske ti pitans yo bal kòm salè a, manje sèlman fini ak li. Kounya, rèv li se pati al nan peyi blan pou li al bote bwat, lave veso nan restoran, gade ti granmoun frekan.
Ou ka kont li ? Non. Wap fini pa dakò ak li paske ti kòb li redi fè lòt bò a pi profitab pase sal tap fè isit la. Isit la, yo pran nou pou bèt.
Bèt ? Ou pa konn gen chyen milyonè ? Yon bèt nan peyi blan pi alèz pase yon ti ayisyen wi. Yo pran nou pi mal pase esklav.
Makomè, jou nou deside fè peyi, kote fanmi dirijan yo ap viv ak yo nan peyi an, kote nou deside bay tout moun souse nan zo a, pou nou chak jwenn nan gato a, map parye ak ou, ayisyen pap al pran desepsyon nan lòt peyi.
Nap sispann gaspiye atò madanm