Sa byen tris pou to kriminalite a ap ogmante konsa epi anyen pa fèt, nap ranse, otorite ap pase popilasyon li nan betiz. Bon, nou pral di yo chanje Normil Rameau yo mete Léon Charles kòm DG ai PNH lan, men eske ap gen chanjman vre ? Lè nou sonje menm Léon Charles sa te demisyone paske sitiyasyon an te tròp pou li, li te enkonpetan, li pat ka jere l, lè n sonje se menm li menm ki te vote kont Venezuela a plizyè repriz. Chanjman Rameau an, epa pito kèk move wout misye pran ? Eske se solisyon pou ensekirite a gro zotobre nan leta bezwen vre ? Kounya, se yon chwal sistèm lan ki pral rache dan bourik yo ? Bourik ki anpeche premye minis Jouthe al danse rabòday nan ti sourit. Nou gen pou nou wè tout bagay nan peyi sa a. Mete sou sa, afich ap sòti pou montre sitwayen yo kijan pou yo pwoteje tèt yo kont kidnapin, kont ensekirite sa a ki ap vale teren ? Ensekirite a, kidnapin lan, se yon katastròf natirèl ? Se yon pandemi ? Se pare pou n pare ? Mèsi lasosyete.
(Nephtalie kap gad enfo sou rezo sosyal yo)
" 3 jeunes filles kidnappées a Delmas 95 … "
"un élève assassiné lors une tentative de kidnapping ratée à Delmas … "
Nephtalie, epaw prèske kriye, Saw genyen kòkòt ?
Hmmm, se kèk nouvèl map li la, peyi an pa bon menm non Nathalie.
Li te deja pa bon, kounya ka anpire nèt pou di m.
Ou imajinew, yo chanje sak te nan tèt lapolis lan, kòmsi m wè bagay la menmjan kòmè.
Ou te vle gen amelyorasyon ? Menmsi li bonè pou mande l rezilta men map raple w se menm nèg sa a ki te vote kont Venezuela, se menm li menm lè tranzisyon an kite DG e lè sa a kidnapin lan te ogmante men wotè, li te oblije demisyone.
Men, nèg yo pa serye non. Yo pran lavi popilasyon an pou tenten wi.
Ou wè nèg sa yo ap panse peyi ? Yo foure Yon lòt tchoul sistèm lan pou ede yo jere biznis yo pi byen. Ou imajine w yo revoke Rameau paske li vle ogmante kòb ti kat polisye yo ! Pou premye minis lan di administrasyon an pa gen kòb pou li sipòte depans sa yo. Men, lè se kontra kap bay yo sifaktire depans yo pou yo fè kòb epi kès leta vid pou peye anplwaye l yo. Nou mele wi kòmè.
E ben nan ka sa, se swiv konsèy afich sou pwoteksyon kont kidnapin lan paske se mèt kò ki veye kò sèm.
Sa lap di li Bondye, kòmsi li nòmal pou gen tout kidnapin sa yo ? Li nòmal pou peyi an gen zòn wouj e chaje kriminèl kap sikile libe libè, lapolis paka arete yo ? Kòmsi nou mete kidnapin, kriminalite nan menm nivo ak katastròf natirèl, ak kovid lan se pare pou n pare pou n chape ? Afich sou proteksyon tèt ou pibliye tankou se afich lè siklòn pral rive, tankou prekosyon pou kovid vid wi. Sa vle di sa kap pase a se yon katastwòf natirèl, li nòmal ? Se pare poun pare ?
O, saw vle nou fè kòmè ? Polisye kap sekirize n ? Kot malere ka peye bòdigad. Sekirite w se responsabilite w.
Nap toujou gen mòd reyaksyon sa yo tanke nap vote pope twèl kòm prezidan, valpa san sèvèl kòm depite, senatè.
Antouka, Bondye se gadò nou, li pap kite n konsa.
Commentaires
Enregistrer un commentaire