Ayiti son peyi pòv e li pa janm pran desten l an men, se konsta nou tou ka fè. Depi lanmò anperè a, Jean-Jacques Dessalines jouk kounya ki prezidan ki fè onè peyi an ? Ki prezidan nou fyè paske li te nan tèt peyi a ? M konn genyen ki pral di Christophe, Boyer, Estimé, Nord Alexis, Hyppolite, Duvalier elatriye men kot sa yo kite pou peyi an ? Nan lòt peyi, chak prezidan ki pase yo kite yon mak pozitif nan peyi an, ki mak pozitif tout lo prezidan yo kite pou Dayiti ? Ann fon gad sa ki la kounya, eske se pa rezilta tout move gouvènans yo ? Yon prezidan ki chita ap ofanse yon popilasyon, eske li gen dwa oubyen li fè l paske l konn anyen mal pa ka rive l ? Sa fè kèk tan chak sòti medyatik, se yon plezi ki gaye.
Nathalie
Kòmè, dènyeman map tande yon seri deklarasyon prezidan, map reflechi, map mande tèt mwen eske se pa eksprè li fè ? Ann pran egzanp lap fon miltiplikasyon, rezilta anplis.
Ou tou wè se lide sifaktirasyon ki nan tèt li, Nephtalie. M pa wè sa pou m ta diw.
Men wap fè m ri.
Serye wi.
M pa kwè sa mwen. Men, se dènye deklarasyon li yo ki dwòl. Lèw rete nan mikro yon radyo ou di, batonye yo asasinen bò lakay li a, mouri a 10h13 e 2 minit aprè madanm ou ap baw wè videyo batonye a yo krible ak bal, sa son lòt bagay. M wè sa son provokasyon. Yo deja sispèk madanm ou kòm otè entèlektyèl krim lan men kounya ou akize menm madanm ou kòm kwa li gen videyo a 2 minit aprè. Se pa nenpòt bagay non.
Si te gen jistis vre, li fin fè deklarasyon an nan jodi demen li menm ak tout madanm li dwe devan jij ki sou dosye a pou di kijan sa fè fèt wi. Se pa paske ou prezidan pou gentan okouran yon krim ki fèt, sal ye la ?
Epa, nan peyi isit. Epa, pou san rezon bandi legalize nan peyi an kounya. Ka grav wi. Si w sòti ou rantre, anyen pa rive w, ou dwe met jenou w atè rele anmwey Bondye mèsi wi. Lavi ayisyen sanble pa anyen kounya.
Ou kwè Biden ta fon bagay pou nou ?
Biden ki prezidan Ayiti ?
Ou byen wè sa map diw la. Al chita tande !!!
Kòmsi map bay manti.
Ayisyen fou wi, pou nou veye afè pa nou nap veye afè lòt moun, Biden ap kite peyi pal pou li devlope Ayiti ?
Se pa sa men li ka ede ayisyen viv yon jan ki akseptab.
Sonje m te diw sa, menm kout bwa lap bay, si li pa pi mal pase prezidan sa a ki la.
Antouka …
Kite priyè ann pran kantik, ou pat tande plezi dan, padon prezidan, kap plenyen li pèdi bannan ?
Mèwi, 100 konntenè bannan pandan kowona. Son pelerinaj lap fè nan radyo wi pitit. Lap mache pale, anyen serye li pap regle. Minis li an di Ayiti gen alèt wouj kowono, li menm ki premye sitwayen peyi an, lap flannen san kachnen. Kòm kowona pap fè l anyen tou.
Kowona e pa pou tout moun li la ? Ou gentan konn moun li pap fè anyen yo ? Plezi kap bay tande kòkòt.
Ann swiv
Yon ti kozri
REZO KRETYEN BENI || RKB
Commentaires
Enregistrer un commentaire