Babay Dadou !!! FIFA, tou manyen kèk lòt dosye cho pou nou tou tanpri souple

Yon lòt rebondisman nan dosye Dr Yves Jean-Bart (Dadou) ki te gen dwèt lonje sou li kòm moun ki tap itilize pozisyon l kòm prezidan federasyon ayisyèn foutbòl la pou li fè agresyon seksyèl sou timoun foutbòl nan ranch Kwadeboukè a. Akizasyon ki sòti dwat nan jounal ''The Guardian''. San etonman, aprè 2 sispansyon 90 jou, FIFA tranche e radye Dadou, prezidan ki prezime koupab la, avi nan tout aktivite foutbòl kit nan peyi an, kit aletranje, mete sou li, fòk misye peye yon amann yon milyon fran swis. Paralèlman, jistis ayisyèn lan blanchi menm prezidan sa a nan menm dosye a. Jij lan chita sou menm bagay ki te egziste depi anvan, ''pa gen ase prèv, pa gen viktim paka gen dosye kont Dadou'', menm bagay avoka Dadou yo tap kleronnen nan laprès. Se yon lòt krent sou eta jistis ayisyèn lan, yon lòt souflèt byen fò Dadou ak akolit yo ba l. Jij lan pa mennen okenn enstriksyon pou l konn plis. Viktim yo fè jounal ‘’The Guardian'', jounalis franse a, Molina ak la FIFA konfyans, yo al temwanye sa prezime vyolè, kadejakè a fè yo pase nan ranch lan olye yal lajistis. Sa di anpil bagay mezanmi. E, nou pa ka imilye jistis lan plis pase sa. Bras nan federasyon an fini Dadou, FIFA pa nan jwèt. Pa mete plis pou nou louvri plè a. Nap tann rezilta pou lòt konplis yo.

Nathalie pitit foutbòl ayisyen an kraze.
Kijan kraze a Nephtalie ? Paske Dadou radye a ?
Ou konnen byen sa m di an. Se Dadou ki tap fè e defè, se li ki sèl kòk chante ou panse li ki pa la li pap jwe pyezemen pou li kraze foutbòl la ?
Bon e prizon ki rete pou Dadou pran, lè l nan prizon an, kijan lap fè gen kontròl wap di a ? Kijan lap fè kraze l ?
Prizon ? Ou fou Nathalie ? Kot Dadou ap pase pou li al nan prizon sa a ? Majistra enstiktè kite sou dosye l la blanchi l wi, li di pa gen plenyan, pa gen ase prèv pap gen okenn pouswit non. Dosye klase wi.
Wap pale de jistis ayisyèn ! Ou pa wè kiyès ki jij sou dosye a ? Se frè jij ki sou dosye petro Karibe a wi, m kwè. Se menm plim menm plimay, yo pa tap janm kondane l non. Mete sou li, jij sa a ki sou dosye Dadou an montre a klè se eksprè li fè, li fè vit fèmen dosye a. Li pa mennen okenn enstriksyon. Ou pa jwen viktim, al chache yo, fè yo mete w an konfyans pou yo temwanye ba ou ! Li jis chita nan biwo l, lap tann epi li konkli.
Ou pa sonje jij lan te mande RNDDH pote kèk enfo pou li, kèk responsab òganism dwa zimen an te di ba yo yon ti tan, li tou kite sa. Li jis konkli.
Peyi an fasil pou nèg yo, yap rache, yap koupe. Jezi wè yo tou.
Bon, sak touye m plis, ou pa tande yo di avoka Dadou an di li pa gason ?
Ki bagay ?
Oo, avoka di, Dadou pa gason pitit, li pa ta ka fè grosè zak detounen timoun nan ranch lan.
Men li fout, yo malonèt. Epi, kot konferans yo tap bay la ? Yo poko ka prepare l ?
Li ranvwaye paske m tande Dadou menm radye nan otèl serye ki nan kapital la. Misye paka itilize anyen.
Men wap bay blag, kijan radye nan otèl la ?
Bon m diw
Antouka, si m li m bay vag. Koze al fè rekou nan tribinal abitral spò an, ka pi mal pou li.
Pandan w di sa, TAS pa ka jije epi kondane misye ? Anplis radiyasyon ak amand yon milyon fran swis lan, TAS paka fè yo tou mete misye yon kote pou machin pa frape l ? Konsa, la sispann gaspiye ti jèn nan peyi an.
M pa konnen non sèm
Te kwè m sonje ou konn tout bagay.
Wap jwe. Pandan nou nan dosye sa a, ou pa tande Binuh kite petro karibe, dèmalòg, kidnapin, pil asasina tankou sa mèt Dorval la, sa etidyan Samul Mical ak Gregory Saint Hilaire pou l manyen, li kite dosye pil masak sou gouvènman sa a pou l pale se nan dosye Dadou li vin louvri bouch li. Kòmsi ti sa a, FIFA pa ka jere l?
Yap fon travay serye ? Yo vle ede peyi an vre ? Te kwè anyen yo pa gen pou yo fè, yap pale konsa. Anmègde moun.
Antouka. Pandan w di sa, pouki nou pa tou lage tout dosye cho nou yo nan men FIFA, nou tap tou jwen jistis nou wi.