Eske nou nan moman pou fè eleksyon ? Eske popilasyon an bezwen yon lòt konstitisyon ? Kijan fè se Yon pouvwa bout ponyèt ki ap fè e defèt ? Jan anpil Moun ap konstatel, blan meriken a travè anbasadè li Madan Sison lage yon twit pou montre gouvènman meriken an ap ede ayisyen yo jwen solisyon an. Men, depi kilè meriken zanmi ayisyen ? Depi kilè yo konn ede nou ? Dim, depi kilè yo vle wè byen pou nou? Anpil pale ap fèt, kòm kwa yo pa gouvène yon peyi sou twitè, diplomasi pa fèt sou twitè elatriye. Men, twit anbasadè fanm lan, se pou ayisyen isit la li fèl ? Eske se pa prepare lap prepare teren an pou aktyèl gouvènman jwen repons ak kesyon yo ka pozel sou jesyon ka Ayiti a ? Twit sa a se pa pou meriken ak ayisyen nan dyaspora li ye ? Menmjan ak anpil lòt dosye cho, ka Ayiti an cho tou nan men dirijan meriken yo. Eleksyon ap rive lakay yo nan mwa novanm, repons yo dwe sou tèt bouch yo. Kisa yo fè pou Ayiti kap trepase pa dwe koke chòt sal gouvènman meriken sa a. Kijan yap ede Ayiti la mezanmi ? Kitem ri ...
Thalie, Saw genyen ou distrè konsa pitit ?
O, madanm ! Panse ak peyi sa a … hmmm
A bon, pa chase strès, rete konsa.
Bon, ou pa wè jan dirijan yo pa respekte okenn prensip konstitisyon an tabli ? Yo ap kraze tout sak te baz sosyete a ?
Sa lap di la Jezi …
Bon pawòl wi. Ou pa wè, enstalasyon konsèy elektoral la fèt malgre manb konsèy la pa ale devan jij nan kou kasasyon an ? E sak dròl la, minis ki te bay lakou an presyon pou krazel la lè premye minis lan te vin mande padon an, debake nan lakou a ak pil gang ak kagoul. Sa ensipòtab.
Konsèy elektoral wap di wi Thalie ? Ki kote ? Ki Peyi ? Jan peyi sa a ye la, ka gen eleksyon ? Bon koze minis sa a wap pale a son wont wi, pou Yon nonm fòme, pase tan nan fakilte pou ou aprann pou ka yon moun demen, pou ou tonbe nan ranpe pou pouvwa, fè dyòb sal la tankou yon restavèk, ka grav wi, nèg isit pa bon menm non.
Wap konnen, pouvwa dous, tout bagay bon pou kenbe l, a ta saw konnen m konnen an yo ta fè.
Yo tap menm vann manman yo pou kenbe pouvwa wap pale.
Epi tou, arete sòti, konsèy pase nan palè nasyonal epi pwen final. Blan pale epi se avozòd. Epa tchoul blan nèg isi ye?
Kòmsi, ti twit sa madan kisa sa lage a fè yo ap fè tenten ? Kòmsi m te tande yo te menase tout moun ki anpeche eleksyon fèt. Epa vre? Te mal tande ?
Yap bloke viza yo gen lè. Nèg isi pa negosye viza non.
E ben eleksyon ap fèt wi.
Fèt ? E pèp la ki gen dènye mo a, wap wè mèvèy.
Epi, yo pa wont, yap fè vog sal yo. Ou te wè madanm blan je vèt la te nan palè ak yo lè KEP a te la ?
E pa mwen kap diw li pat mete pyel, li kite yo fè tenten yo pou kont yo.
Bon, ann kite eleksyon epa menm konstitisyon yap manyen tou !
Oo, pouvwa sa son pouvwa avi wi. Bannann 50 tan, si yo pa vle 100 tan wi.
Men wap bay blag.
Oo, blag ? Pa gen opozisyon, blan ak nèg la, sosyete an ap dòmi, nou lèd, nou sal, nou sòt, ka nou grav, je nou pete …
Antouka, prèske gen lanmò janm wè a.
Ti pa ti pa nou sanble ap rantre tèt dwat, je fèmen nan yon diktati. Pandan gen dosye petro Karibe, kat dèmalòg, pa gen palman, plizyè rapò koudèkont rete san pa gen swivi, masak Lasalin, Bèlè, ba Dèlma, plizyè lòt masak, asasina batonye an, etidyan damyen an, ak anpil lòt ankò mache dola ki pa gen kontròl, grangou, lavi chè, blakawout, fatra tounen po flè nan lari elatriye. Pou vle deranje konstitisyon. Epi, yap pale de eleksyon, ki eleksyon? Eleksyon ak kep dèmalog sa ? Kòm 7 fevriye 2021 nan pa pòt la, nap swiv sa ki pral pase. Ala ti peyi devèn mesye, oo. Ann swiv.
Yon ti kozri
Stéph LeBéni
REZO KRETYEN BENI || RKB
Commentaires
Enregistrer un commentaire