VAR

VAR
Eske li nòmal pou nap viv nan venteinyèm syèk sa pou Peyi an gen zòn moun pa ka pase akoz ensekirite ? E depiw pase la, yo konsiderew kòm yon ewo. Bon, ka sa a grav anpil. Mache pèp lan, mache kotew jwen tout bagay ou bezwen, fin kraze. Se pa paske li te fèt an beton li kraze men vòlè, bandi, gang pran zòn lan an otaj e machann tankou kliyan ki konn achte pè pase la. Kisa nap fè ak peyi sa ? Kisa nou vle ?
- Nathalie, ou pap al nan fak lan? Lè a preske rive sou nou wi.
-Pa enkyetew Neph, nap gentan rive.
-Sa wap di la, li preske 8 è wi. Ou bliye Ayopò ak Nazon toujou gen yon vye blokis. A dizè nap rive .
- E ben ann pran yon bis lavil.
- KISA?
- Sa lavil genyen ? Epi si le cho, yo pase pa anndan Ayopò wi pitit, gad jan Nephtalie kapon.
- Se pa kapon, se pridan. M pa wè rezon pou pran bis la non, kòm anba l'avion Cho, se Ayopò lap pase, pitom pran kamyonèt.
- Bis la ap tou chaje Bonrepo wi. Olye ou monte desann nan kamyonèt, pito ou pran yon vòl dirèk nan bis.
- E ben ok madanm . . . ou fini ?Ann ale non.
- Ann soti non.
Efektivman yo pran yon bis lavil. Men lè yo rive drouya, chofè a fè dwat, li pa monte Ayopò. Li rive Aviyasyon menm kout baton, li fè dwat pirèd. Moun yo tonbe ap rele : “ Anmwey chofè ou fou, kote wap pase ak moun la”, “Woy Jezi sovem, men m nan mitan mechan yo”, “Chofè sim mouri la, li pap bon pou ou non, map manjew wi”, “son konbinezon ou genyen ak vòlè parèy ou yo”, “Gad figi misye, kot papaw wap Mennen nou poul touye nou”.
Anpil vye pawòl AP di, chofè an kè kalm. Nathalie AK Nephtalie wè Yon jèn gason ak yon gwo zam, ki vin parèt, kè yo ale. Chofè a gaz kole. Lè yo rive nan stasyon an, chofè a di yo : ''mete pyen' atè, bann lach. Nap radote sou tout rezo sosyal yo, menm la nou pè. Ale wè yon bann moun legliz nou ye, sin' tou mouri la na al jwen mèt nou pi rapid.''
Yon lòt reponn li: ''se Mwen ki fè la eta sa? Se pa vòlè parèy ou yo ki kraze la! Si se voye yo voyew di ou pa wèm, gang.''
Chofè an map li rale yon manchèt ki te bò chèz li an, sitwayen an pete yon kouri. Pandan Nathalie AK Nephtalie AP mache yo tande anpil bri katouch, yo mache rapid pou yo rive kote yo prale an, yo pa anreta lekòl lan.
- Nathalie ou anraje wi. Gad kote ou fèm pase. EEEEEEEEEEEEEEEEEEY, gad travay li.
- Bon, ou pa menm dim mèsi, nou pa anreta.
- Kòmsi ou fèm pase nan yon zòn konsa poum diw mèsi …. Epa wap pasem nan tenten.
- Pa dramatize bagay la, ou mouri? Yo tire sou nou? …. Non
- Wè machè, si nèg AK zam nou te wè an te deside tire lè sa ou ta blabla vre.
Ensekirite sa a kap fè raj nan peyi an, kiyès li fè byen? Kiyès li fè mal ? Nou pa sispèk nou fouye twou nou, e se menm nou menm ki tonbe ladan ? Kòmsi nou pa remake absè a pete nan figin' ? Ka grav, jwèt lan make san, ann rebat kat lan. Ann chache rezoud pwoblèm yo.

Mike S. E. CHERISIEN (Stéph LeBéni)

Rezo Kretyen Beni || RKB