Ensekirite

Ensekirite

Nathalie ki bezwen yon moun blòk Kafou, li leve granm maten tou deside, li ale kot moun lan. Pandan li nan kamyonèt, li tande bri anpil katouch, tankou se nan lagè, bagay film nèt. Se tow tow tow tow tow, bribribribribribribribribri … moun ap kouri nan tout direksyon, moun ap tonbe atè se « men nèg yo desann » « pa rete la, yo devan men yap vini » « jeten’ »  « Anmweeeeeeeeeeeeeey, Jezi sekou » … tout moun pèdi tèt yo. Nathalie kouri desann kamyonèt lan, li tonbe kouri san gad dèyè. Li wè yon vye depo kote plizyè moun kouche atè, li kouri rantre pou l kouche. Apèn li rantre, yon mesye kite pye pou pye dèyèl, pran yon katouch, li tonbe plat atè, li pa bouje, Nathalie pouse yon gro kri, li kouri kouche. Pandan Nathalie kouche atè a, li vire gad bò pòt li sot antre a, li wè mesye kite dèyèl lan ki kouche atè a kap benyen nan sanl. Nathalie pè, lap tranble kou fèy bwa, lap di Jezi sovem nan kèl. Li rale telefòn li nan pòch li, li fè nimero manmanl, li sone san repons, li refèl, menm bagay lan. Li rele Sebastien, gran frèl lan, menmjan, li sone san repons. Li vin rele Frank, mennaj li an, sa pa sone menm, mesajri dirèk. Li di nan kèl « kèt map mouri tout bon vre, men pyès fanmim pa reponn » li tonbe kriye li vin di « Jezi, Bondye papam konsa wap kitem mouri, ou pa sonje jan m konn chante poum baw glwa, jan m kenbe tèt mwen poum pa fèw wont ! konsa Seyè. » Li kriye pirèd. Li vin eseye rele Nephtalie.

• Alo, Nathalie cheri, sak pase ?
• Neph …. Talie
• Nathalie, saw genyen ? M tande anpil bri kotew lan ? Epi sanble wap kriye ?
• Kot Tamy m tap prale, ti dam kafou an, men m tonbe nan mitan yon afrontman, se nan yon vye depo m kache, pou wè moun ki mouri, m pa konn si map chape. M eseye rele manmi, m pa jwen li, menm Sebastien ak Frank m pa jwen. Sin pa ta wèm, na vin chache kòm. Wa di manmanm pou mwen, m renmenl anpil, m regrèt pa fwa m fèl pale anpil, la padonem tout sam fèl li pa renmen, li son bon manman. Di Sebastien m  te kontan ti sèl, dil m voye yon gro mèsi paske li pa janm fache lè map takinenl, li se yon bon gran frè, li ranplase papam valableman. Di Frank lap toujou sou kèm aaaaaaaaaaaaaaa … 
• Alo, alo, ALO NATHALIE.

Apèl lan koupe, Nephtalie kouri al lakay manman Nathalie, poul al dil sak sot pase a, e wè sa yo te ka fè.  Lèl rive, li di sa, manman Nathalie rantre nan lapriyè, li priye, li priye. Li di Bondye papa, ou kwè wap kitem pran kou sa a. Lap priye, lap kriye, lap priye, lap kriye. Sebastien vin parèt, li mande yo sa yo genyen, Nephtalie kase moso ba li, li sezi. Li ap kritike jan sitèm peyi sa pa bon, ensekirite a pa janm fini, se pi mal li vin pi mal. Al dèyè polisye, youn pap ale nan zòn lan. Manman yo di li konfyan Bondye pap fèl wont li pap pran kou sa, li ranmase kouray li, li kontinye priye ak lafwa. 

Pandan tan sa, katouch ap fè kenken kot Nathalie an. Gen kèk bandi ki vin parèt devan vye depo kot Nathalie kouche a. Yo voye je yo anndan, yo wè gen moun, youn nan yo di « ann fini ak sa yo ki kouche anndan ». Kèk nan yo ki te kouche a ki tande sa leve kanpe pou kouri, bandi yo simen katouch sou yo, tout pran bal, gen yon madanm ki pran bal ki tonbe sou Nathalie, li ki tèlman sezi, endispoze. Yon machine ponpye ak yon bakòp Idmo vin ap parèt, yap tire, yap avanse, gen kèk nan bandi yo ki pran bal, ki tonbe atè, lòt yo ki wè sa tonbe kouri, yo rantre nan kachèt yo, yo ale. Tire a vin kanpe. Apre yon ti tan, kèk anbilans vini, sekouris yo ap chache pou wè si gen kèk moun ki vivan toujou, yo rive nan depo kot Nathalie an, yo wè yon pil kò atè a, youn rive sou Nathalie, li wè kèl ap bat, li di madanm sa vivan, ann vin pranl. Nathalie benyen ak san madanm  kite tonbe sou li an, men li pat blese. Pandan yo metel nan ambilans pou yo ale ak li, youn nan sekouris yo, fouyel, pran pyès li gade nonl, pran telefòn li. Li wè dènye apèl la se “sista” ki ekri, li relel.

• Alo Bonswa
• Alo, se sè Nathalie Ducrot?
• Wi wi se mwen wi. Sal genyen ? Li anfòm ?

Nephtalie kouri met telefòn lan sou spikè pou manman Nathalie ak Sebastien tande.

• Alo madanm, sèw lan pa grav, li sèlman te endispoze, sa ki nòmal pou yon moun ki te nan mitan yon gro afrontman tankou sa ki sot gen la, men li ap revini tipa tipa, se nan lopital nap mennen li nou met vini pou nou kore li, se nan Lopital … 

Apèn Nephtalie fin pale ak sekouris lan, Manman Nathalie, Sebastien ak li kouri pran machin pou yo al nan lopital kote yap mennen Nathalie an. Manman an rete men anlè lap remesye Bondye pou grosè mirak sa a li fè pou li an, pitit fil lan soti lwen ...

Yon peyi paka mache ak ensekirite, peyi an mèt gen tout avantaj si gen ensekirite, moun ap pè envesti, pwogrè pap fèt. Ki donk li se yon pwazon pou abitan nan yon peyi. Leta dwe mete bon jan dispozisyon pou trake bandi, mare yo, mete yo nan prizon. Pa okenn mwayen yon moun, paskel gen pouvwa itilize, ame, peye yon gwoup bandi pou konbat lòt bandi li pa vle wè. Sa pa nòmal menm pou premye minis pran mikro poul di bandi konn relel tanzantan e se yon problèm. Kisa nou vle montre ? Bandi kap edew jodia pou bat yon lòt, demen li ka vire kont ou depi yo bal plis kòb, se avantaj lap chache. Pou konbat bandi e fini ak enskirite se ekipe lapolis, mete yon lame solid ak bon jan ekipman pou sekirize popilasyon an. Se pa simaye zam bay patizan w kap bay blòk ou sekirite men se ranfòse ekip ki la pou sa. Zam pa simaye san kontròl bay moun ki nan sitiyasyon defavorab. Jodia ou bay yon gwoup moun zam, ou bay chèf yo kòb chak mwa pou fè pewòl, se vre yo obeyiw paske ou ap finanse yo. E demen lè kòb ou fini, oubyen siw vin pa la wap reprann zam yo? Yap obeyiw toujou ?  Kiyès kap jere yo ? Kisa yo pral fè ? Se ti pèp lan ki pou peye po kase an ? Zam se yon pwazon pa kitel nan men nenpòt moun.

        Nap swiv … 

Mike S. E. CHERISIEN (Stéph LeBéni)

Yon ti kozri || Rezo Kretyen Beni || RKB

x