Transfomasyon

Transfòmasyon

Anpil nan  nou renmen lè nou chanje etap pou aparans nou montre sa. Si ou patap travay ou vin jwen yon djob, ou renmen lè aparans ou montre se yon moun kap travay, si ou tap viv nan peyi isit ou vin pati, ale nan yon peyi aletranje, ou vle gen aparans yon moun kite pati. Men gen aparans ki konn egzajere, e fòk nou fè atansyon ak li.

• Nathalie saw gen la pitit? Ou tankou yon moun ki sot wè yon zonbi !
• Madanm, hmmmmmm ! gen koze wi nan peyi isit, men nan pwen bouch.
• Sak gen ankò?
• Eske ou te konn Natacha ? Tifi ki te rete dèyè do lakay la, li te nan lekòl lan. Li te vin double twazyèm e li te tou kite lekòl lan, ou sonjel ?
• Pa sonje, tifi chocholin lan !
• Wiiiii komè
• Sal fè la menm?
• Sa gen kèk tan wi, m wè yon demann zanmi sou fesbouk, mal gad kiyès, kounya m wè moun lan anvi sanble ak li, m vag paske m sonje li te nwa …
• Yon nwa fonse men ti pol te fen se sak fè li te bèl e gason te dèyèl’, mete sou gro bouda li an.
• E ben li sanble pat wè po l te bèl !
• Kouman sa makomè?
• Foto m wè yo se foto yon grimèl nèt wi, pi wouj ke ni ou, ni mwen wi Nephtalie. Pou dim moun sa te wè po l bèl !
• Men non, li ka travay foto a pou li gen aparans grimèl men li pa grimèl.
• Mwen te panse sa tou men li bon grimèl lan.
• Sak fèw di sa ?
• E ben avanyè sanble li te vin bò lakay lan …
• Sal te vin fè? Ou pa dim li te kite lotbò an?
• Wi li parèt la ankò, ou konn li gen kèk limena parèy li ki rete nan lakou lakay lan, li sanble te bezwen yon bagay nan men yo. Antouka  yo pale kont yo e li sanble bay sekrè grimèl li an.
• KISA? Sekrè grimèl? Pa touyem non Nathalie.
• Bon m diw, se konsa wi limena yo tap di.
• Banm sekrè a non.
• Bon ou grimèl deja ou menm. 
• A pitit, son konesans an plis li ye.
• M tande, li gen yon ekip limena Petyonvil lap frote, ou konn se rout frè li rete, zòn akademi an, sanble se medam sa yo ki bal resèt lan. Yo di, li di ou fè yon bon beny ak kloròks ...
• Kouman beny kloròks la ? Pale klè makomè.
• Ou sou sa Neph, men li ou mete yon bon kou dlo nan yon kivèt, ou mete anpil kloròks ladan, ou chofel, ou metel’ nan yon benwa, epi ou foure kòw ladan, tout kòw, ou kite sèlman tèt ou, paske se nan demen pou fè vizaj ou… WOY Nephtalie, epaw endispoze… Nephtalie, rete pitit, leve non. 

Pandan Nathalie leve poul soti al chache yon ti dlo, Nephtalie leve e li dil

• Madanm ou touye m la !
• Wè ou menm tifi, moun pa dwe an afè ak ou non, m pansew endispoze wi.
• Non m sezi wi, kifè, moun gen kouraj chofe yon dlo kloròks epi yo al domi ladan?
• Janw tande l lan cherim
• E EEEEEEEEEEEEEEEEEEY moun antrave. Ki mal yo fè yo? Ou ka dim ?
• Yo manke bèl yo vle mete sou bote yo.
• Men tann mwen, ou pa wè ti sèm lan ? Son blak, yon bèl blak, li pran swen kòl, li toujou fre,e nenpot gason ki gason depi ou wèl ou paka pa tonbe, bouch ou paka pa kouri sòs, sou 3 pye pou rete, li pa nan chanje koulè po, son krèm fanm. Sanble se malpròp yo malpròp, yo pap benyen, yo pap pran swen kò yo, nwa vin rasi sou yo.
• E ben deyò a gen plizyè se fanm krèm, fanm kloròks yo tounen. M pa konn si yo manfouben janw di an men yo renmen pase ti krèm yo.
• Ou pa wè mis inivè 2019 lan,  son blak tèt grenn, li pran swen kòl, li bèl, li waw e li mis sou yon bann lòt ki gen cheve siro, ki gen cheve long e ki blanch.
• Men fòk ou konnen sak nan tèt moun lan, kisa yap chache.
• A Nathalie, pa vin pran pou yo, fòk ou mande yo eske yo konn kijan pou yo pran swen kò yo tou.
• Koumansa ?
• Bay vag, sèl bagay se tèt yo yap fè mal, lè yap itilize pwodwi pou manje melanin ki sou po yo an, ou pat tande gen yon madanm ki mouri akoz melanin pol manje?
• Non, m pa konn koze sa non.
• Fanm nan tap grimèl kòl ak ti krèm li, pol fin manje, li vin ansent, mal chans pou li, li paka pouse timoun lan, doktè oblije fè sezariyèn, chak tan yo koud li, pol chire, pol pa ka kenbe fil yo, ala fin van fin rantre anndanl nèt li mouri.
• Wouch, doktè a te dwe itilize tep, li tepel pito.
• Sa wap di konsa! Lèw doktè wa itilizel tep ou menm ...
  

Koulè nwa pa yon enferyorite parapò ak pyès lòt koulè, dayè li pi rezistan, li pi atreyan. Ou dwe pran swen kòw, paske jan provèb lan dil lan, vizaj ou se paspòw, ou dwe pran swenl. Men pa gen  foli sanble ak blan, po nwa se youn nan koulè po ki pi bèl sou latè, okenn lòt koulè paka konpare ak li. Retire foli sanble ak lòt moun, ou wè zanmi fè, oug anvi tou. Bon Bondye kreyew blak, lèl vin dèyèw lap wèw blan, sa sa vle di ? Esansyèl lan se pran swen kòw, kenbe frechèw. Fè yo imitew. M blak e m fyè.

Mike S. E. CHERISIEN (Stéph LeBéni)

Yon ti kozri || Rezo Kretyen Beni || RKB