Nap veye men èske nou pare? (Pati 1)
Menm si tout kote gen moso tèt chaje pa yo, nou ka poze tèt nou kesyon, kouman sa te ye isit lan?
Fòk nou sonje peyi Dayiti sot pase yon ane 2019 ak Yon pil troub sosyo-politiko-ekonomik. E nou ka menm avanse depi lè nouvo prezidan sa a monte sou pouvwa a bagay la mangonmen pi rèd ke avan. Chanje Gouvènman pa pote solisyon, mete kòb nan ekonomi an pou frennen dola ameriken an ki ap vale tèren fas ak goud lan pat itil anyen menm. Yon dola ki rive 100 goud. Èske se volonte ki pa genyen pou sa chanje vre? Paske pwodiksyon lokal la pa finanse vre, pa gen enfrastrikti, kòb leta fè lòt bagay ke ede peyi an vanse, bidjè gouvènman plis yon bidjè fonksyonman olye envestisman... Kot manje nan plat ayisyen an? Kot lajan nan pòch lan? Gaz karavàn nan fini? Premye Minis sou premye minis pase e dènye sèn lan te montre jan nou ba tout bon, 2 gouvènman t ap souse ti resous leta nan menm peryòd lan. Lè Lapin te demisyone, malgre depite yo te mache ak gouvènman Fritz William nan, gras a prezidan chanm depite an, Gary Bodeau, kite vante tèt li kòm yon nèg ki gen metriz nan òganize seyans, chanm senatè yo pa briding, gouvènman sa rejte. Men gouvènman Lapin an kontinye, malgre li te demisyone. Anpeche Lapin ou Fritz William premye minis sanble pat kontrarye plan prezidan an paske li vin alèz pou mete youn sou pye. Li pa bezwen depite yo paske manda depite yo fini, li pa jwenn opozisyon senatè yo paske chanm sena kadik, 2 tyè nan sena a gen manda yo fini, selon prezidan an. Jouthe Joseph monte ak yon gouvènman tou nèf pandan Fritz William Michel demisyone. Sa l t ap regle e ben?
Pandan kèk palmantè t ap toke kòn ak prezidan an, opozisyon an tap pran daso e rantre nan lojik fèmen peyi an, ''peyi lòk''. Yon desizyon leta ki pa fè pèp la plezi, fè tout moun gonfle ponyèt yo montre yo fache, tout Moun rete Lakay yo. Nou raplen' leta te kontribye nan youn nan premye peyi lòk yo lè li te vle ogmante pri gaz la, Brezil elimine nan koupdimond, epi .... peyi lòk. Prèske chak dat istorik te gen peyi lòk: 17 Oktòb, 18 Novanm, 7 Fevriye … te lòk. Lèn' panse tout bagay fini, leta ap jwe kwen, pa gen gaz. Malgre yo di bato rantre, pa gen gaz pi rèd nan ponp pou vann ak popilasyon an. Nèg ak pil galon jo-n fin awoyo, pa gen gaz pou vann senp sitwayen men genyen pou vann an gwo ak revandè ki pra l mete l sou mache a byen chè. Galon gazolin te gentan depase 1000 goud, galon revandè achte 250 goud. Epi blip ... peyi lòk. Lekòl kite gentan louvri oblije fèmen, tout aktivite paralize. Fòk nou di tou, nou chape anba yon peyi lòk nan mwa Fevriye an. Leta te pran pòz diktatè l, pa okipe mouvman polisye yo ki t ap mande bon kondisyon travay, ogmante salè yo, epi kite yo mete yon sendika sou pye. Polisye ke pouvwa a itilize kòm bouwo pou kraze manifestasyon opozisyon pa nenpòt ki mwayen, te vin anfas menm pouvwa sa a. E menm leta sa a ki di li pa gen kòb pou satisfè demand polisye yo, te deside fè kanaval. Lwa Desalin polisye yo monte yo, yo boule stand e menm rive gen yon afwontman tèrib, premye jou gra a, ant polisye ak kèk sòlda swadizan lame peyi an, yon lame po patat, milis woz kèk moun di.
Kisa Leta ap regle menm? Sosyete an pap janm pwogrese? Nap swiv ...
Mike Stéphane E CHERISIEN (Stéph LeBéni)
Rezo Kretyen Beni || RKB
Commentaires
Enregistrer un commentaire